投票進入倒數，中方聯同董班子，托市不遺餘力！除咗奧運金牌選手親自催谷，特區政府勾地，亦好神奇地兩日連勾兩幅，庫房進帳數以十億計，加埋誇張性嘅經濟增長預測，一時之間歌舞昇平，令香港人有身處喺一九九七年六月嘅幻覺。
不過，連賣兩幅地，又係為咗乜？若然要落實經濟知識轉型，實現「高科技港」偉大藍圖，咁新勾嗰兩幅地，冇理由又用來發展地產，而應該附有條件，要求勾地商用嚟發展IT軟件嘅設計、生產、製造。𠵱家唔聲唔聲，又撥多兩幅地用嚟起樓，咁咪即是回歸地產泡沫型經濟？重有十七萬空置單位積壓，幾時至出得晒貨？七年來又話改革、又話轉型，兜一個大圈，又返回「地產」兩個字，其間港人嘅資產就蒸發咗三萬億，片皮拆骨，又再原地踏步，咪即是混吉？
講到混吉，被判勞改六個月嘅何偉途，聽講又有機會提前獲釋「保外就醫」咯喎，唔知有冇機會呢兩日凱旋而歸㖭。若然偉哥返港，就可以召開記者會，講述吓所謂「嫖妓」嘅真相，同埋東莞公安點樣熱情款待嘅關懷，另外搵埋老婆一齊站台，夫妻相擁，喊成一團，話唔定重可以增加選票㖭。
叫雞要勞改，可以不經司法審判，勞改話明半年，又可以提前釋放，咁嘅「以法治國」，香港人真係多謝夾唔該。何偉途榮歸可以令選民多加反省，香港最重要嘅資產就係司法獨立，警方冇權一掃黃就將個嫖客扣留喺域多利警署半個月。何偉途提早南返，以第一身經驗，引證到香港人更加應該選出一啲法律守護神，先至可以防止收容教養有朝一日殺入香港！
傳真︰2623-9278
電郵︰