有東方諾貝爾獎之稱嘅邵逸夫獎，噚晚喺會展舉行頒獎禮，真可以話係冠蓋雲集，全城最有權、最有勢同最有腦嘅都畀面出席，特首董建華原本一早應承做主禮嘉賓，點知突然又話中國奧運金牌運動員要嚟香港訪問，兩邊都要畀面，惟有出席完金牌運動員大匯演嘅開幕禮，連精采表演都唔睇，就即刻趕去邵逸夫獎嘅頒獎禮。
頒獎禮主人家邵逸夫爵士唔單止親身出席，重企足全場，可見身體仍然硬淨，而夫人方逸華就成晚盡顯女主人本色，喺台下打點一切。至於出席嘅嘉賓，政界有梁振英、曾蔭權、何志平；學術界有各大學嘅校長同教授，中大歷屆五任校長，包括馬臨、高錕、李國章、金耀基同埋現任嘅劉遵義都有現身。
董建華致辭時例牌大講一輪科學研究有幾咁重要，重話無咗科研，教育制度就唔會完整，但係一講到科研最需要嘅錢時，董特首就口風一轉，話除咗政府撥款之外，各大學都要自己爭取資源，喺台下嘅幾位大學校長聽到，真係唔知有乜感想。
邵逸夫獎每年都頒獎畀天文、醫學及數學上有突出研究成就嘅學者，今年有六位得獎者，每個獎嘅獎金係一百萬美金，得獎者之一係出生於香港嘅加州大學三藩市分校遺傳學權威簡悅威教授，佢致辭時重特別用中文話佢係香港人，嚟自香港，今次得獎係雙重榮譽。
另一位得獎者國內南開大學數學專家陳省身教授，就係香港科大校長朱經武嘅岳父，陳教授已經九十多歲，要坐輪椅領獎，但朱經武話，岳父年紀雖然大，頭腦重好清醒。
傳真︰2623-9278
電郵︰
