「老笠」卜比笠臣離任後，行情一直較睇好雲拿保斯或者奧拉利最有機會接棒，所以前日突然爆出桑拿士由布力般過檔執教，都幾令人意外。查實桑拿士喺布力般地位已經唔多穩，家吓突然轉投一支實力更強嘅隊伍，重唔係時來運到，飲得杯落？
呢個消息落實後，英國《太陽報》即刻查到，原來桑拿士手持同紐卡素有好密切關係（間公司高層係紐記主席個仔）嘅體育管理公司嘅股份；雖然只係佔全公司零點零三幾個巴仙，但難免惹人聯想佢能夠獲委以重任，箇中係有利益關係。再講，原來近代紐卡素領隊，好似基瑾、杜格利殊同埋卜比笠臣都曾經擁有呢間公司股份，唔怪得英格蘭足總準備為呢件事作調查啦。
巴西前鋒阿祖安奴當勇人所共知，韋利可能心知不妙，日前喺國際米蘭練習賽好搏命，個人射入七球。雖然係咁，教練文仙尼公開講今季國際米蘭雙箭頭首選係阿祖安奴搭馬田斯，即係韋利冇份，理由係佢同阿祖安奴踢法太似，至多可以踢後備喎。話晒文仙尼當年同韋利喺拉素並肩作戰，估唔到都冇面畀；不過換轉角度諗，佢高調公布正選箭頭，或者想激勵舊隊友都唔定。
就喺美國禮拜三作客對巴拿馬（世界盃中北美洲及加勒比海區外圍賽）嘅前夕，美國隊突然將首席門將侯活送返英國，而並冇公布箇中理由。據我求大俠所知，侯活上個禮拜六對薩爾瓦多重踢得好好哋，幫球隊贏對手二比○；亦冇聽見佢有乜傷病，今次突然離隊都幾離奇。曼聯領隊費爵爺不嬲對球員踢國際賽鬼火咁緊張，唔知侯活呢次突然出走同球會壓力有冇關係呢？
雖然中國國腳中場李鐵嘅腳傷唞咗好耐，啱啱至開始用番個波練習；不過愛華頓未至於完全將「鐵爺」遺忘。當愛華頓隊醫認定佢傷勢進展唔錯，預料可以響今個月底復出先擔任後備之後，會方即刻透過官方網站大肆宣布呢個消息。李鐵好番後將會面臨激烈爭位，𠵱家會方咁重視佢復出，對佢嚟講係先甜後苦，希望可以鞭策到佢努力啦。呢粒「拖肥糖」真係唔易食。