八方噚日喺最新一期嘅警隊報紙《警聲》度睇到兩段幾有趣嘅文章，想同讀者分享吓。其中一段講警察拜關二哥嘅起源，原來始於一九三一年，當年駐守油麻地警署偵緝部嘅一個「咩喳」（SergeantMajor）叫黎兆，喺「大房」內供奉關帝神位，以示會好似關二哥咁忠於職守，並且祈求庇佑，查案時能順利破案，自此其他差館陸續仿效，時至今日。
另一則報道講，香港警察戰術訓練隊同訪問團一行七人，早排由副處長馮兆元率領，到新疆維吾爾自治區首府烏魯木齊，作為期五日嘅戰術理念培訓同交流，係香港警隊首次喺新疆舉辦嘅戰術訓練，重話係將國際上先進嘅實戰技巧帶畀當地警察。
咁樣，今次唔知算唔算係香港警隊為祖國打擊疆獨活動出一分力呢？
（圖）香港警隊喺新疆舉辦戰術訓練，睇落唔嘢少。《警聲》圖片
傳真︰2623-9278
電郵︰