國企又試嚟過,國指跑贏恒指。中央開綠燈畀社保基金買股票,重磅國企燈燈燈櫈彈上去,3隻保險股國壽(2628)、人保(2328)同平保(2318)成為搶手貨,升幅4.3%至8.1%。
中企C輪:周一推介嘅中企指數C輪9962,再有6.1%進帳,唔算太多,值得追落去。3隻保險股係國指成份股,保險股升,指數有着數。社保基金買股票,好自然會揀埋其他啲交投量大嘅國企,對拖動指數有作用。保險股升又拖動埋其他國企。連環拖動對國指上升會有好好效應。
9962年底到期,輪價18.9仙,溢價4.1%,槓桿率7.5倍(有效5.3倍),引伸波幅38.6%。同類輪9447壽命短兩日,輪價16.3仙,溢價8.4%,槓桿率9倍(有效5.3倍),引伸波幅45.8%。前日講過,買9962,咪要9447,兩隻輪拍埋貨比貨,9962靚好多皮。
中石油C輪:社保基金既然可以買股,大大隻嘅中石油(857)大概會成為目標,至少大家咁諗,中石油股價就會上去。買啲中石油C輪玩吓,穩穩陣陣,抵抵食食,揀9343,12月中夠鐘,輪價81仙,負溢價2.1%,槓桿率5倍(有效4.7倍),引伸波幅29.2%。
恒指C輪:大市有欲罷不能之勢,睇昨日即市圖,個市稍為回軟,啲錢又再撲落去。吼住買恒指C輪,好多隻可供選擇,9911係其中之一,年底到期,輪價20.5仙,溢價2.6%,槓桿率14.9倍(有效9.6倍),引伸波幅21.4%,1日成交6.26億份,佔發行量63%,易買易賣。
章盛