新地代理出租豪宅SignatureHomes，喺灣仔總部開設「家居概念」寫意廊，提供好似屋企咁舒服嘅聚腳地點，畀尊貴嘅租客，同時作為舉辦座談或興趣班之類活動。
簡單啲講，就係設計成豪宅嘅寫字樓。計我蘭西話，實際用途係提供環境舒適嘅地方，畀租客簽約就真。
聽講，寫意廊花咗六個月及逾五百萬。佢哋重話，歡迎記者上去休息㖭。
不過，蘭西好懷疑，有冇租客咁有閒情上去「聚腳」。至於參加活動，乜新地唔係標榜旗下豪宅會所好多嘢玩嘅咩？使唔使去到咁遠上興趣班？
深井碧堤二期即將開賣，利嘉閣噚日與九倉黃光耀喺碧堤會所打網球賽，順便當做宣傳。
黃光耀出咗名係運動健將，網球當然難唔到佢，利記出到雙打陣營，有執董廖偉強同區域董事蔡榮增，都一樣敗陣，最後頒咗個金牌畀黃光耀。
利記兄弟公司中原都趁開盤前積極造勢，將碧堤分行改裝成主題分行，二期其中一個賣點就係露台，中記就喺分行室內，搭個道具露台，配埋家居布置海報，相當逼真。
蘭西上周出席淺水灣GrosvenorPlace記招，之後請管理公司仲量聯行幫手call的士，點知搞咗一輪都冇車，最後要自行落山搵車走。
仲記噚日來電，話物業路邊有燈板，當日職員着咗燈，等路過的士睇到，入嚟載客，點知冇的士經過。職員再打上call台搵的士，但係遲遲未有車。佢解釋話，管業處職員係新人，雖然好心急四圍搵的士，但安排唔到車又冇同記者講，先至有誤會。
大埔豪宅，過去兩日有七宗成交，一般係七百零至八百萬。當中有一單，銀碼特大，接近三千萬。
如此大手筆，喺港島豪宅好平常，大埔就罕見，去到咁大碼，間屋一定有番咁上下巨。美聯曹仕賢話，嗰間係聚豪天下董事屋，近六千呎，係今年大埔豪宅交投中最大一間屋，呎價五千。買賣雙方都係廠家，原業主賺咗五百五十萬。
中國國家奧運隊，前晚出席招待晚宴，唔少嘉賓乘機同運動員影番張相留念，信和韓家輝都唔執輸，除咗同跨欄王劉翔影相，當然唔少得跳水公主郭晶晶啦！呢股旋風認真厲害。
蘭西
電郵地址：
