小初一直以為只有一啲有問題嘅細價股，先至會同核數師講唔掂數要遲出業績，點知堂堂大型內地機場股美蘭機場（357）亦兩次延遲公布中期業績，令好多投資者都被嚇親。
美蘭延報業績，原因係要額外時間對中期業績報告及關連交易，與業務合作單位及境外會計師進行溝通，真係睇完都唔明佢想講乜？隻股噚日最低見過5.90元，收6.10元，成交股數346萬股，金額2112萬元。
經紀黃話，美蘭向來成交稀疏，原因係貨源主要由芬佬坐住，今次有咁多貨沽出，唔排除係芬佬不滿，在成件事未搞清楚前，不宜博反彈。
另外，大廚入主大華國際（600）已有多時，除咗開頭炒過一轉，之後唔多見有炒作，直到最近有老友成為主要股東，同埋打算將大華易名為東方明珠實業後，隻股終於有起色。大廚亦轉為高調，頻頻亮相搞醫療科技，大華股價則愈見活躍，噚日彈升14.29%，收0.208元，成交金額791萬元。
慕容小初