八方噚日講過自由黨為咗壯聲勢，連馬會主席夏佳理都出動埋，有人問，現貴為財政司司長嘅唐英年唔知會唔會都出嚟幫田少站台，拉吓票？
點知特首辦話，到今日為止，冇一位PO（問責高官）諮詢過老董嘅意見，言下之意，即係冇PO會企出嚟幫候選人拉票。唐唐嘅新聞秘書都話冇聽過佢老頂會同自由黨拉票。咁香港雖然好政治化，但係政府仍然扮中立，扮無黨無派，唐唐就算心想支持，都識避嫌啦。
又唐司長噚日下晝飛咗去廈門出席第八屆中國投資貿易洽談會，星期四就返港，趕得及星期日投票，唐唐已經由九龍搬咗去港島，佢投邊個冇人知，因為呢區自由黨冇人出來直選。
依目前形勢嚟講，田少要喺新東取一席不難，周梁就辛苦啲。田少佢老哥大把錢，新東周街都見佢同自由黨嘅宣傳板，大大細細都有，想睇唔到都難，聽講田少真係後悔名單只有佢一人，益唔到街坊。
傳真︰2623-9278
電郵︰