上個星期LouisVuitton喺東京舉行一百五十周年派對，可謂星光熠熠，女星小雪、佐藤江梨子同上原多香子等，唔止攞住ＬＶ嘅新款手袋入場，重戴埋首飾晒行頭。不過，木村拓哉嘅歌手妻子工藤靜香，當日就比較casual，佢身上冇乜嘢係LV，聽聞好似得啲手甲畫咗LV嘅花紋，唔怪得佢唔肯大方畀記者影相啦！
上星期四LV喺東京搞嘅派對，真係非常熱鬧，唔少女星都盛裝出場，身上都係LV最新最潮嘅貨色，好似喺荷李活打響名堂嘅小雪，同日本新音樂女王松任谷由實，齊齊攞住個茶色嘅毛毛LV手袋，原來成五萬五千蚊一個，而小雪右手戴住嘅戒指，亦要十二萬蚊，非常昂貴。
當晚着到成個洋娃娃咁嘅上原多香子，最搶鏡嘅唔係佢手揸嘅袋仔，而係佢着住嗰對有毛毛皮草圍住嘅高跟鞋，對鞋差唔多成六千六百蚊。而佐藤江梨子手上嘅Monogram手袋就要成一萬二千蚊，相信係唔少女士嘅心頭好。而視狗如命嘅川島直美，竟然用個Multicolour嘅水餃袋袋住隻狗，認真巴閉。
不過，當日唔願意畀記者影相嘅工藤靜香就較為失色，佢雖然一身潮媽打扮，但過份casual，成身都唔見有LV嘅嘢，只係搽咗LV花紋喺指甲上贈興。聽講佢上個月中喺屋企湊女，搞到碌落樓梯手腳受傷，左腳重要打石膏，不過睇嚟佢已經冇乜事啦。