講起香港你會想起甚麼？帆船？金紫荊？茶餐廳？天星小輪？最近香港電台搞了個「十個最代表香港的設計選舉」，由多位設計師提名出50個代表香港本土特色的設計及節目監製，讓市民投票選出當中十大，結果將於9月底公布。入選設計個個陪住你同我成長，關係親密，哪個又是你的心頭好？
採訪：陳慧敏 攝影：伍慶泉、陳智良、黃子偉
五十個候選作品之中，有新有舊，但似乎愈有歷史價值的，愈有集體回憶，當中，經過百多年風浪的渡海小輪，不但與香港人建立了深厚感情，也是遊客心目中的香港代表，近月更因「幻彩詠香江」而令維港遊晚晚爆滿，要當選十大之一應該「實食無黐牙」。至於「與時並進」的紙紮品，極具香港特色，當選呼聲亦高。
候選設計No.43紙紮用品
支持者：寶華紮作店太子歐陽秉志
理由：「紙紮同香港一樣，古老得嚟又不停有啲創新嘅嘢推出。」
去年以一支送給家駒的紙紮結他成名的阿志，用卡紙做的冥界用品，在紙紮界享負盛名，老師傅個個見到都讚好。最愛埋首靜靜搞創作的志仔，最新力作滑板Trikke，還有一系列的名牌手袋，實行要陰間陽間一樣追得上潮流。「香港人個個追上潮流，看見故人親友找到能令陰間朋友開心的禮物，那種笑容最令我開心。」
寶華紮作（27769171）深水埗黃竹街34號
候選設計No.50天星小輪
支持者：船主梁華發
理由：「天星小輪有106年歷史，PostCard又係佢，國家地理雜誌《人生必到五十個景點》又有佢，重唔係最具代表性？」
發叔年屆50，細細個貪「航海界」個名夠型，坐船追看水手拋纜，又用雪條棒同橡筋砌船仔，一到18歲就入職天星小輪做水手，一做32年，近年升埋職做船主，駕駛維港遊的「輝星號」。「最記得79年颱風河貝襲港，我同幾位水手通宵守住條船纜，第二朝就見到有隻大洋船撞咗埋卜公碼頭，幾大件事呀！望住個海咁耐，我都可以講句：『真係咩風浪未見過呀？』」
天星小輪維港遊（21186201）
「梗有一間喺左近」的茶餐廳及長達八百米的半山行人電梯，分別是設計師Ziggy及Freeman之提名，且看看美感觸覺特別敏銳的他們有何說法。
候選設計No.8茶餐廳
支持者：設計師ZiggyKoo
理由：「茶餐廳最特別嘅地方，佢可以因應時代變遷而作出調整而屹立不倒。本來得粉麵同包嘅茶餐廳，又會出現中西式嘅碟頭飯，同香港一樣乜人都有。」
有份提名「茶餐廳」的展覽設計師Ziggy，爸爸係麵包師傅，媽媽係茶餐廳常客。「小時候每朝同爸爸飲完早茶就同媽媽去茶餐廳食第二Round，食菠蘿包飲好立克。當時我最鍾意食菠蘿包夾炒蛋，爸爸重勁，直情將個蛋撻夾入菠蘿包入面食，食到我哋都好肥！」Ziggy令記者相信，創意是可以遺傳的。
場地：美都茶餐廳（23846402）油麻地廟街63號
候選設計No.13半山行人電梯
支持者：平面設計師FreemanLau
理由：「河流係人類文化嘅開始，半山電梯就好似條大運河咁，灌溉咗呢一帶嘅文化同藝術創作。」
這條由皇后大道中中環街市，延伸到半山干德道的行人電梯長800米，Freeman最愛沿住電梯而上，同時留意電梯兩旁的二樓精品店有甚麼變化。「留意吓呢度好多特別嘅二樓小店，每次過嚟都會有唔同嘅發現。而且沿路有好潮嘅酒吧、創意小店、舊式缸瓦舖、連傳統豬肉店都有，走一轉已經睇到好多嘢！」
行人電梯採單向運行：
06:00-10:00往下運行
10:00-22:00往上運行
其他精選
大約二十年前，一個菠蘿油（約比菠蘿包貴5毫子）已經叫做「高檔嘢」，細路仔有得食已經覺得「好High」。咬下去包身軟滑，外皮香脆，半溶化狀的冰凍牛油在唇齒間慢慢溶化，是今日成年人最懷念，國外旅遊雜誌追捧的地道食品。
「三支香」晾衫竹簡直是香港公共屋邨的標誌，晾衫竹末端可用來掛陳皮及地拖，相信不少人小時候都幫過阿媽晾衫。但設計上有潛在危險，曾有人晾衫時不慎墮樓，所以房署自95年起便為獨居長者免費更換拉輪式晾衣架，今年起，公屋居民更可向房署申請資助安裝新的晾衣架。
1962年在報章雜誌出生的漫畫人物，64年推出首期單行本後風靡60至70年代，小記同媽媽都係睇佢大。一講「耐人尋味」、「天方夜譚」及「小題大作」等成語，大家都諗起老夫子地道又搞笑的市井故事。直到四十多年後的今日，還推出動畫老夫子、Q版老夫子等，連台灣、澳門及中國大陸都認得其嘜頭！
1.菠蘿油
2.鴛鴦
3.炸兩
4.西米撈
5.咖喱魚蛋
6.冰皮月餅
7.閃燈乳豬全體
8.茶餐廳
9.涼茶舖
10.女人街帳篷式建築
11.舊樓鐵籠露台
12.公屋
13.半山行人電梯
14.旺角油麻地霓虹箭嘴燈
15.香港國際機場
16.尖沙嘴鐘樓
17.滙豐銀行總行
18.中銀大廈
19.青馬大橋
20.香港會議展覽中心
21.海防博物館
22.竹棚
23.當舖招牌
24.白底橙花外賣杯
25.尼龍帆布床
26.晾衫竹
27.丫叉
28.魚網拖
29.客家帽
30.紅色膠燈罩
31.紅白藍袋
32.沙灘
33.摺櫈
34.摺麻雀枱
35.點心紙
36.隔水蒸餸架
37.西瓜波
38.蒸餸夾
39.維他奶樽
40.白花油
41.八達通
42.鐵皮信箱
43.紙紮用品
44.舊式店舖拉閘
45.MichaelLauFigure公仔
46.麥嘜
47.老夫子
48.曾灶財
49.舊式電車
50.天星小輪
詳細參加辦法請瀏覽網頁：