奧運金牌明星來港表演，自然轟動。最唔好嘅就係董先生公開要求北京畀香港在二○○八年北京奧運分番一兩個項目。唉吔，香港已經有自由行，CEPA話搞「民企自由行」，呢兩樣可以講得係互惠互利，誰也不欠誰，但監人賴厚咁伸手求奧運項目在香港舉行，面唔面紅啲呀？捫心自問，香港有邊樣特別靚場地去辦奧運項目？（事實上，內地四個城市已經同北京安排好，香港插手落去爭，要得到國際奧委會批准至得，實在係增加北京嘅麻煩。）《南華早報》社論（九月四日）題為Putawayyourbeggingbowl,MrTung（直譯：拿走你的乞兒碗，董先生），對特首好唔客氣，啲老外睇到怕會笑到老董面黃。
特區政府鍾意向國家伸手，立法會議員就識得向立法會伸手。前有涂謹申，後有陳婉嫻，租番相關政黨團體物業，租金是否高於市價，甚有疑點。涂謹申租佢自己有份嘅物業，因屬住宅舊樓兼拆細分租，左丁山唔識睇，要信測量專家評估。陳婉嫻租工聯會觀塘物業，每平方呎十七元五角，肯定過高。點解呢？因為左丁山啲老友今年第一季租入中環嘅心臟地帶，可謂係中環最中心嘅區域嘅老年寫字樓，呎價不過係十三蚊，行過去政府合署西翼，只需兩分鐘，到立法會唔使十分鐘。以此相比，觀塘二三線寫字樓要呎價十七個半，貴唔貴啲呀？三年前，律師T曾經問左丁山要唔要用觀塘嘅工業大廈單位做寫字樓，免租，同業主交水電差餉管理費就得嘞，因為完全冇人肯租喎！最好笑嘅係工聯會引述美聯物業估價指陳婉嫻辦事處租值達六十元一呎。美聯黃建業老闆應該垂詢佢哋嘅估價專家，何所見而云然？大家問銀行借按揭，不如搵美聯估價，冇蝕底噃，可惜銀行未必信啫！