許冠傑（Sam）下個月十號至十七號喺紅館再開八場個唱，門票噚日公開發售，演唱會出品人丘亞葵話阿Sam呼籲fans喺網上點歌，而阿Sam為咗配合下月個唱嘅「夏威夷嬉春」主題，到時分分鐘會赤裸上身露點都唔定。
雖然阿Sam呢次第四度賣飛，唔及上幾次短短幾個鐘頭內全部賣清門票，但反應都算唔錯，噚日朝早九點幾，已經有過百fans喺紅館排隊，早上十一點所有一百蚊門票全部賣清，只剩番小量四百同二百五十元嘅門票。
而噚日排頭嗰幾位女fans更加係着住阿Sam最鍾意嘅豹紋衫，雖然佢哋已經睇咗好多場，但都依然睇唔厭。
不過，噚日城市電腦售票網竟然錯漏百出，好似有fans買第三行變咗第七行，等找續又等咗個幾鐘，搞到排隊嘅人好唔耐煩好鼓譟。
無綫請咗有樂壇教父之稱嘅UncleRay做一個十三集音樂特備節目，UncleRay會請好多音樂朋友上節目傾偈。噚日第一集佢請咗泰迪羅賓同鄭東漢做嘉賓，之後有集會講貓王皮禮士利（ElvisPresley），許冠傑係貓王歌迷，UncleRay話：「我梗係想請佢啦，不過佢係唔聽電話嘅，我同佢老婆講咗，但佢老婆話由朝到晚都冇見過佢，佢真係好忙。」
台灣名模林志玲最近為時尚雜誌影相，講到着衫心得時，佢話：「我覺得流行應該是一個完整的生活態度，一般所認為的流行，對我來說是抓不到的東西。
「我最喜歡MarcJacobs、AnnaMolinari、JeanPaulGaultier這三個品牌。我比較喜歡那種帶點小女孩的浪漫感覺，這三個品牌讓我可以做一點女孩子的打扮，有很女孩子的感覺。」
由陳果、南韓導演朴贊郁及日本導演三池崇史執導嘅電影《三更2》，前日喺威尼斯作觀摩電影上映。放映會之後，觀眾對陳果嘅《三更2之餃子》迴響特別大，因為片中食嬰胎餃子同墮胎嘅情節，對於意大利呢個天主教國家嚟講係屬於禁忌，好多意大利人睇完後都話好反胃。
佘詩曼噚日接受商台電話訪問，講到佢有份主演嘅電視劇《金枝慾孽》，成日傳出女角不和，問佢係咪真有其事，佘詩曼就梗係話唔係啦，佢話：「我哋個個都掛住背對白，邊得閒搞嘢呀，呢啲都係宣傳手法啫，唔係緋聞，就係不和㗎啦。」之後問佢同陳浩民喺北京係咪成日食飯，佢話：「咁朋友食飯好平常啫。」佢重強調自己冇男朋友㖭。
蕭亞軒日前喺台灣帶咗愛犬妮妮去食麻辣火鍋，但最搞笑係佢哋「兩母女」各據一鍋，重食得好開心㖭，蕭亞軒話：「我的狗兒吃的是普通鍋，平時我都會把涮羊肉給牠吃，有時則淥菜給牠吃，補充纖維質，助牠排便。」蕭亞軒話如果遇上天災，佢都一定會將手上嘅食物分成三份，畀佢、蕭媽媽同妮妮一齊食，佢真係愛心爆棚。
