傳「晒士」成1400億元嘅中國社會保障基金，會撥出唔超過40%的資金入市，消息刺激噚日國企股全面翻醒，特別係壽險股，更有傳會係社保基金率先吸納嘅對象，人保財險（2328）最勁，高收2.675元，大升8%，國指重上4400大關，收4407，升52點。
大市表現反覆，在13100水平爭持，收13136，升31點，成交137億元。大藍籌以地產股最突出，二三線股更搶到飛起，俊和（711）有「靚地」概念，股價一路搶到上1.16元高收，大升18.3%，漢國（160）亦有近10%進帳。
其實，樓市轉活，美聯物業（1200）亦率先受惠，噚日就以大成交破位而上，照度上去，起碼可見3元。里昂出咗份報告，話今年首8個月本港物業交易總數上升56%，總值上升111%，反映物業市場進入上升周期，預測樓價到05年底會上升30%至40%，建議買入美聯，目標價6元。
樓市看好，資產股再現追捧，大酒店（045）呢隻優質豪宅股又再發力，升上近半年來的高位，成交大增到400萬股（係上日的9倍），以大圓底形態衡量，今次收集完成，上升目標6.4元。
大酒店04年度（12月年結）上半年，獲利1.98億元，大升8.4倍，每股盈利14仙，中期息3仙，更係近幾年來首次。下半年，酒店業務表現持續強勁，而豪宅租賃市場則顯著復甦，估計全年盈利可達4.7億元，每股盈利33.5仙，派息12仙；05年盈利可再上升到5.7億元，每股盈利40仙，派息14仙。美林出報告就維持其「優於大市」的評級，目標價係6.8元。大酒店係基金股，PE較高，一來係業務有穩定增長，二來其資產極厚，引起基金憧憬。截至今年6月底止，股東權益135.32億元，每股資產淨值9.65元，但計入今年酒店同豪宅升值之數，每股淨值可達11.8元，現價大折讓53.8%！
和黃（013）近日頻有動作，單係主席李嘉誠就先後9次增持，而分拆旗下和記電訊國際（HTIL）上市的計劃短期亦可完成。由於3G上客量大躍進，大行全面睇好，一升破65元，起碼見80元。睇好和黃，買Call輪最着數，9780平水，槓桿率8.5倍，10月中到期，炒1個月，隨時賺3至5成。
郭兆誠