果然俾經紀陳估中，南海石油（076）噚日復牌真係大上大落，原來真係好多人好似小初一樣鍾意撈底博反彈，喜歡富貴險中求。
隻股噚日一開波就三扒兩撥勁升至1.43元，收市報0.88元，升138%。
南海石油升幅固然駭人，但最得人驚就係成交股數有成5.15億股，金額4.5億銀，簡直與藍籌股有得揮。經紀陳估計，咁大成交應該係有唔少炒家炒出炒入好多轉之故。
另外，華人置業（127）噚日公布截至今年６月中期業績，賺5.89億元，比舊年同期勁升231%，派發中期息8.5仙。
華置股價亦受到刺激，大升4.18%，收5.10元，成交股數418萬股，金額2099萬元。
經紀黃話，自從幾個月前，大股東以每股4.85元減持後，華置股價回落咗唔少，之前跟風的散戶好多已心淡離場，但隨着近排地產股回勇，加上公司又頻頻回購，股價已經浮返上嚟。
不過，江湖傳聞繼大股東上次賣舊股之後，唔排除華置會搞多次活動，幫公司集資發展，想跟炒要多加留意。
慕容小初