早排接拍科幻動作電影《AeonFlux》而整傷條頸嘅金像影后查理絲泰朗（CharlizeTheron），近日已經返咗洛杉磯嘅寓所休養，不過佢同男友史釗活唐辛（StuartTownsend）主演嘅另一部新片《HeadintheClouds》，下星期五就會喺美國開畫。
講開呢套戲，相信唔少人都會將注意力放喺查理絲同佢男友史釗活身上，因為佢兩個繼年前嘅定情之作《贖命風暴》之後，再度攜手合作。不過其實戲入面查理絲同西班牙女星彭妮露古絲（PenelopeCruz）嘅破格演出先至係焦點所在，兩大靚女着得性感惹火不在話下，而且重有唔少床上纏綿情慾戲㖭。
《HeadintheClouds》嘅故事背景發生喺三十年代至第二次世界大戰之間，史釗活三三年喺英國邂逅查理絲，二人發展成情侶，但查理絲因母親去世而離開英國。後來查理絲寫信邀請史釗活去巴黎居住，加上由西班牙避難到巴黎嘅彭妮露，開始咗三人嘅同居生活。
直到三六年西班牙內戰如火如荼，史釗活同做護士嘅彭妮露決定到當地為戰地居民出力，其間二人發展一段微妙感情，而喺法國嘅查理絲就搭上咗一個納粹德國軍官。