好多人放假，會走去東南亞，對住陽光海灘梳乎吓，印尼峇里島係熱門，遲啲大家可以試吓喺當地買樓嘅滋味，高力下個禮拜五六，喺中環文華酒店搞峇里物業展銷，推介Club151。個盤喺峇里南部Seminyak區，同海灘咫尺之遙，買嚟度假甚至退休都有得諗。
個盤提供兩類型洋房，二十間單層式，四千八百幾呎，間兩房加十二米長私人泳池，售二百一十幾萬起，另一種係傳統兩層式，有三十九間，三千二百幾呎，都係兩房，私人泳池得十米長，不過就多個私人瀑布，售百七萬起。
計番條數，原來喺世界著名度假勝地買屋，呎價都只係四百幾五百蚊，重平過深圳，同中山、東莞差唔多。
蘭西記得，新地舊年賣元朗YOHOTown，前期軟銷好着重介紹會所，𠵱家入伙在即，終於有機會實地睇吓製成品。
項目高級策劃經理鍾永添話，YOHOClub耗資億元，佔地二十萬呎，最特別係二十四小時開放嘅「無時限開心地帶」，有餐廳、保齡球場、健身室、桌球及環迴視聽音響室等。
為求逼真，發展商請咗真人示範，玩吓健身、表演打鼓，而室外泳池，更加請嚟模特兒即席示範游水。
收樓今日開始，新地成立驗樓專家組，早喺五月，開始測試質素，趁近排落雨，又檢查吓有無漏水。
中國奧運金牌得主噚日抵港，今明兩日大滙演，為咗方便市民一齊睇節目，大角嘴奧海城二期商場，室內外全程播放有關節目，包括今晚七至九嘅《中國人的驕傲金牌運動員大滙演》，聽日下晝三至六嘅《金牌運動員大滙演》，等街坊同遊人，可以熱熱鬧鬧睇show，同場會有飲品食物供選購。
另外，直播節目期間，會有遊戲環節，只要喺美食坊消費，憑發票可以參加抽獎，獎品包括運動啞鈴水壺、運動毛巾腕表、運動毛巾套裝等。
玩截擊至耍家嘅長實，今個周末又出新招，斥八萬銀，改裝一部小巴，取名「移動銷售支援中心」，內置無線寬頻上網設備同信用卡機，隨時隨地招呼東涌悅濤軒準買家上車，上網睇樓兼簽單碌卡。
講到明係「移動」，當然係駛去行家新盤附近截客最實際，今個同下個周末，會先揀深井作為首站，擺明以九倉新盤示範單位參觀客為目標。長實話，如果效果理想會改裝多幾部車，實行多點截擊。
樓市勢頭轉好，就快開賣嘅深井碧堤半島二期，成為西灣河嘉亨灣後，另一市場焦點。
各大代理嚴陣以待，預備總動員出擊促銷。
中記同美記分別話，動員千八同千五人，去推銷呢個樓盤。利記同港置，就動員一千同五百，粗略計算，有成四千八百幾個代理，齊齊促銷，深井區好快又會變得鬧哄哄，周末再次人山人海。
人海戰術外，銀彈攻勢少不了。中記陳永傑話，準備用三百萬作支援，美記張錦成就話，會投放七位數字去促銷。咁落本，唔通今次佣金好吸引？
沙田中心畀各界嘅形象，向來都係細單位上車盤，原來佢都有特色相連戶，八百四十六呎。
美聯曾慶祥話，全個屋苑得八個相連特色戶，放盤極之少有，近排啱啱有一個業主肯割愛，成交價二百五十三萬，呎價接近三千銀，都算相當理想。
個買家係新加坡華僑，舊年已經喺港租住物業，因為打算參加投資移民計劃，所以落實買樓，遲吓會繼續購買心頭好。
蘭西
電郵地址：
