深圳健力寶喺近兩、三年中國聯賽冒升最快球隊，而且國腳數目不比大連實德、上海雙雄少。不過，最近球會主要贊助商財政困難，宣布退出，對呢間中國南部大球會影響幾大。
中超聯今季第一季開咧前，保證每間球會有一筆可觀收入；但聯賽進行唔夠一半，深圳健力寶就傳出因為贊助商問題，處於困難時期，睇嚟中超聯發展未有預期咁樂觀。據聞球會拖欠球員薪水同獎金高達七百萬人民幣，加上入場觀眾人數未如理想，今季入座率最高一場比賽都只有十萬收入；扣除場租及營運成本，根本冇錢賺，現時球會已準備全數轉讓畀其他贊助商。
健力寶擁有鄭智、李瑋峰同李毅等國腳，好似鄭智咁重有歐洲球會搵佢，相信明年一月份球員轉會市場重開時，有中國球員到歐洲搵食機會好高。
我求大俠早排有提過曼聯借將董方卓，今季喺比利時乙組光芒四射；呢位中國小將日前聯賽又有士哥，取得全場唯一入球替安特衞普奠勝，連續四場聯賽後備入替都有士哥，喺安特衞普成為咗大紅人。國足教頭阿里漢雖然話未有留意董方卓，但以佢表現，入選國家隊只係遲早嘅事！
車路士領隊摩連奴繼續高調，話如果球隊要攞英超聯冠軍，積分一定要超過一百分先至有機會；即係話一季之內最多只可以輸三場、和一場，其他比賽一定要贏晒先至夠數。阿仙奴上季以不敗完成奪標目標，都只得九十分。我求大俠認為目標訂到咁高，咪盞加大球員壓力。
智利前日同哥倫比亞合演○比○「激」戰，場波充斥球員插水、犯規吹停，全場有威脅射門得兩三次，重少過紅牌數（共四人被逐）；智利比沙路明明踢得好又被換走，離場時怒踢廣告牌。在場六萬人見證呢場好似「內定」晒嘅悶和鬧劇，唔「激」氣至奇，噓聲四起。
雖然西乙並唔係主流賽事，但我求大俠間唔中亦有留意，發覺呢個聯賽去季已經唔旺入球，而今季趨勢更明顯。好似禮拜日七場波得一場入波多過兩球之後，開季至今踢咗廿二場波，只有七場開上盤（大），比率唔夠三分之一；唔怪得澳彩一直將下盤（細）賠率調響一點五倍水平啦。