參加飯局，碰到肥L。與肥L講起退休，佢就有嘢講：「房協推出牛頭角彩頤居，我覺得好正，最適合電影界老編導。呢班老友退休後，通常冇乜錢，但夠資格參加房協嘅長者安居樂計劃，房協應該邀請佢哋入紙申請。」編輯S立即加入：「我話好多退休編輯亦係處於同樣環境，如果房協邀請老編導，應該搵埋老編輯至啱！」你估立法會功能組別咩，再講落去，老演員、老記者、老教師……總之自己認為啱心水，就自己去申請，肥L與編輯S相信都係講笑啫。
肥L嘆息話香港電影大退步，製片人指令編劇唔准使用敏感語言，何謂敏感？肥L話一套八十年代嘅戲，有六二年難民潮回憶鏡頭，劉德華有一句對白：「佢走呀走呀，俾解放軍追到，一槍打死咗（大意如此）。」製片人話：「解放軍點會開槍殺自己人呀，唔講得嘅！」原來有咗CEPA之後，電影界多咗一個夢，就係拍電影，到大陸放映，收番一億幾千萬人民幣，香港只係一個小市場。在內地放映嘅電影，必須事先送檢，任何敏感語言?對白?鏡頭都唔可以出現，以免內地禁映，電影公司蝕晒大本。
因此咯喎，編劇頭都大晒。左丁山話：「拍二十一世紀背景嘅影片，百樣禁忌，不如拍歷史功夫片，唔使驚啦。」肥L話：「你真外行，歷史片、古裝武俠片係唔准我哋拍嘅，屬內地影廠專利，因為怕咗我哋歪曲歷史，借古諷今喎！」哦！咁又唔得，真係要大量創意先至掂，唔怪得肥L似乎甩咗一啲頭髮。拍本港sitcom（環境喜劇）又如何？肥L話：「以前任你玩，𠵱家唔同環境咯。冇人會叫你點做嘅，醒目嘅就自己執生啦！」總之大家自律，歌頌穩定，飯碗就平安啲。