美股周一冇市，港股自由發揮，好友借機一挾就上，恒指又創出今浪新高，收13104，大升156點，成交近125億元。國企指數收4355，升40點，升勢蓄銳待發。
1個月後，政府就會拍賣何文田前天光道警察宿舍地皮，呢幅地俾財團成功勾出，底價50.2億元，以最多和最少樓面建築面積計算，樓面地價分別約3000元同4900元，保守估計拍賣成價超出底價3成，則日後賣價會去到7000至9000元。勾地消息對新盤同現樓（包括一、二手物業）嘅銷售有刺激，料未來數月樓價可在現水平再升15%至20%。
今個升浪，地產股一直都帶頭，噚日3大藍籌地產股都勁升，升幅由1.7%至2.9%不等，未來大市向14000大關進發，地產股同滙控（005）、中移動（941）及和黃（013）仍會擔當重要角色。噚日早市買藍籌Call輪，好似滙控嘅9876，中移動嘅9813，同和黃嘅9766，到下晝已有十幾個巴仙利潤，短炒可獲利，中線則可繼續持有。
國企以石化同鋼鐵股表現最突出，前者有北京燕化（325），升3.9％；後者有馬鋼（323），升3.7％。馬鋼見有大行大手扯吸，由於現時鋼價已由低位大幅回升到接近今年第2季的高位水平，但鋼鐵股價仍比今年高位低出頗多，大行現時重新上車，相信鋼鐵股價有機會在年底前再創新高。
04年（12月年結）上半年，馬鋼營業額128億元（人民幣．下同），升81%，獲利23.16億元，升150%，比市場預測為佳。由於第2季推出宏觀調控，盈利8.03億元，遠比首季15.13億元為少，不過仍比去年同期大增84%。
近日鋼材價格回升頗急，可以預期鋼鐵行業最黑暗的時刻經已過去，大行在現水平不斷收集鋼鐵股，最明顯係馬鋼，必然有因，相信下半年盈利可以由第2季的低位回升，保守估計為20億元，令全年盈利上升到43億元，每股盈利66.5仙（折62.7港仙），預測PE只係4.4倍。大行出報告推介，目標價為4元，屆時PE只係6.4倍！
郭兆誠