上周五美股冇預期跌得咁勁，昨日亞太區股市幾乎全線上升，日股尤其勁揪，一彈就係221點，幅度2.1%。港股都唔失禮，有156點進帳，升幅1.2%，似乎進入欲罷不能境地，有小回然後大漲，好友大有機會繼續飲香檳。
滙豐C輪：滙控（005）收123元，升1元，幅度好似唔大，但啲C輪槓桿率唔細，放大效應相當好睇。滙控今年高位129元，有唔見高位誓不罷休之勢。搏殺炒滙控C輪，揀先幾日提嘅9876（個冧把好易記嗰隻），輪價58仙，下月中到期，溢價0.7%，槓桿率21.2倍（有效16.9倍），引伸波幅15.3%。隻輪自動波，跟正股上去，正股升2元，去到尾隻輪升到70仙。正股升4元，隻輪升到90仙。正股若見129元，隻輪升到1.10元。
恒地C輪：地政總署公布何文田天光道前警察宿舍地皮，有財團勾地，下月12日拍賣，最低出價保證50.20億元，樓面103萬方呎，每方呎樓面地價將近4900元。地價升，地產股水漲船高，股價生猛，昨日所提嘅新地C輪9977與2151，分別上升21%與12%。恒地（012）李老搞500億元基金學美國股神畢菲特，投資股票，嘉亨灣計劃地皮20億成本，發展費用20億，全部賣晒收番百二億。隻股昨日升1.10元，個勢未盡，可買先幾日推介嘅恒地C輪9038。
9038年底到期，輪價47仙，溢價3.4%，槓桿率8.2倍（有效5.7倍），引伸波幅35.8%。同類輪，冇隻夠佢靚。
章盛