我求大俠發覺愈嚟愈唔夠馬會玩，呢幾晚國際賽事，馬會除成功將兩場入球大細盤口稍作調整，如佢哋所願熱倒冷出外，擺明比單Ｗ更好分嘅半全場重未有得玩過關，更令大家難搵食！
噚日藍鑽石都已經喺「瞭望台」專欄講過，讚馬會真係捉到大家心理，將上周五晚荷蘭對列支敦士登嘅入球大細盤，定為罕見嘅三點五球而真係開瓣冷啲嘅細；結果前晚又嚟一場聖馬力諾對塞黑，都係三點五球開細，重一樣係強隊贏三比○，死未！
另外，全部贏波強隊都係半場已贏，「主主」及「客客」俯拾皆是，但馬會繼續無得玩半全場過關，令大家錯過贏錢機會；其實外圍有咗半全場過關好耐，偏偏馬會重未有得玩，點打擊外圍呀？
拉脫維亞喺世盃外圍賽主場輸波，教練史達高夫斯重被罰離場；其實佢教埋呢場及周三對盧森堡後就離任，轉到莫斯科斯巴達執教。𠵱家被罰出場，周三難逃停賽，變相提早離隊。難怪佢被罰出場時，全場球迷都向呢位帶領球隊首次取得歐國盃決賽周資格嘅教練鼓掌答謝啦！
講開呢兩晚足智彩賽事，當大家都見到好多場強隊單Ｗ只得一點○幾倍，諗住串番啲主或客其他波膽過關，是但有三幾隊入到對手五球就搞掂；點知數埋兩晚，都只係得瑞士及瑞典「達標」。搞到坊間唔少球迷，對嗰啲只係僅贏三比○、四比○，入多粒都無本事嘅所謂強隊「媽媽聲」。
唔怪得啲人成日話國際賽係失意軍人爭表現嘅好機會啦，上周六晚世界盃外圍賽，愛爾蘭嘅摩利臣、羅馬尼亞嘅梅度、希臘嘅簡拿高普路斯、斯洛文尼亞嘅艾斯莫域、立陶宛嘅贊卡斯格斯等喺所屬球會冇正選嘅球員，都有唔錯兼有入波嘅好表現，希望對佢哋番到球會時有幫助啦。
美國喺外圍賽贏咗薩爾瓦多兩球，其中一球係嚟自程拜恩，呢位效力聖荷西地震嘅前鋒認真唔簡單，兩場外圍賽都有士哥，上次完場前幫美國迫和牙買加。其實，程拜恩係首個夏威夷出生嘅國腳，佢舊年曾韌帶受傷，最後靠家鄉著名滑浪操番起狀態，球迷們不妨留意吓呢位程生！