與一班教授吃午飯，人人都雞咁腳，急急鬆人，佢哋話大學已經開學，唔可以出嚟太耐喎，左丁山以為大學教授唔係返朝九晚五，唔使趕返工，點知表錯情。教授話大學資源短缺，校長要人人增值，唔走多一步唔得，即係人人都學咗賽馬會口號Standingstillisnotanoption，唔做嘢就唔好企定定。
搭地鐵之時，問T教授今年嘅學生質素如何，佢話：「好嘅仍然好好，差嘅仍然好差。我讀大學之時，一百個中五學生，只有兩個入到大學，𠵱家有十八至二十個，所以平均質素差好多，不足為奇。我哋教書好辛苦㗎，一來學生未必掂，二來工作量大增。UGC話唔津貼商學院碩士生，又限定本科生學額，如果照到足，校長話我哋十個人之中，要炒三個。如果唔想炒，就要收到啲self-financed嘅超額學生，譬如得到UGC補助嘅學額有四十個，每個收學費四萬二千零，再收多三十人，自負盈虧，每個收學費六萬；但收咗之後，同係一科經濟學導論，兩組學生唔可以一齊上堂，要分開上，於是講師本來可以開一班，全班七十人，現在要開兩班，佢嘅工作量增加一倍，如此類推。成個學系，我哋教書工作量平均增加百分之五十，薪水繼續減，好彩冇炒魷啫。」
T教授當然唔怕炒魷，不過大學教授以前係清高人士，現在需睇市場導向，兼且商學院要賺多啲錢嚟津貼文科、理科學系，簡直係捱義氣。不過既然搞市場導向，發展落去，都係要分科收取不同學費先至合理。醫科生收貴啲，哲學系學生收得最平，藝術系學生動用好多顏料，又收多啲，商學院最受歡迎學科如會計系、計量財務學系（中大○四年該科畢業生得最高年薪三十九萬）不妨收貴啲。差異價格合乎理論，至於能否推行，難難難！