西班牙鬼才導演艾慕杜華（PedroAlmodovar）最近搵咗《衰仔失樂園》墨西哥型男加艾爾加西亞般奴（GaelGarciaBernal）主演新片《聖．教．慾》，般奴喺片中犧牲色相，唔只扮有易服癖嘅同志，重同男對手有大膽情慾鏡頭，甚至淪為孌童癖神父嘅玩物㖭。
《聖．教．慾》被視為艾慕杜華嘅半自傳式電影，佢話片中有唔少情節係佢童年嘅回憶，其中主角讀小學嗰陣俾神父性侵犯，相信就係導演嘅親身經歷。
不過艾慕杜華唔怕引起教會不滿，佢話：「我唔係要清算令我『誤入歧途』嘅神父，要報復都唔使等四十年啦。教會對我呢個微不足道嘅傢伙唔會有興趣！」
除咗加艾爾加西亞般奴喺片中扮同志之外，艾慕杜華舊作《對她有話兒》嘅肥仔男主角查維亞嘉瑪拿（JavierCamara）亦有份演出，佢扮演一位有易服癖嘅超姣同志，令人忍俊不禁。艾慕杜華話：「我有好多易服癖同變性人朋友，對我嚟講活喺同性別錯配嘅身體係悲劇，不過佢哋解決呢個問題嘅方法，令我充滿興趣。」
《聖．教．慾》嘅故事結構比起《對她有話兒》更複雜，艾慕杜華話雖然兩部片都有戲中戲，但《聖．教．慾》嘅戲中戲長達半小時，絕對考驗導演嘅功力。