上周五，美國Intel走勢眾所矚目，收20.05美元，跌幅7.4%，細過預期，低開後全日大部份時間喺20美元上下拉鋸，成交83球，係上日嘅2.8倍，金額犀利，達130億港元。本港所謂「國際金融中心」，1日股市成交幾乎比唔上1隻Intel。杜指跌30點，納指跌29點，而歐市則全面上升，情況冇乜點壞。港股上周五冇升到，估計稍作整固，繼續向上。
中企C輪：國企指數全周升78點，收4314，最高見過4380，有機會消化後上破4380，稍後上4600/4700嗰頭，宏調影響漸告消退，兩大石油股帶住指數上去，其他落後國企亦因落後而造好啲。中企指數C輪揀隻嚟炒。
熱門貨有9948、9447、9962。9948上周五收7.2仙，冇跌到，咪揀呢隻。其他兩隻年底到期，可以貨比貨。9447輪價14.5仙，溢價9.5%，槓桿率9.9倍（有效5.5倍），引伸波幅45.1%。9962輪價16.5仙，溢價4.6%，槓桿率8.4倍（有效5.7倍），引伸波幅37%。9962溢價（慳番4.9個百分點）、槓桿率、引伸波幅都着數過9447，壽命長兩日，交投又多啲。9962上周五跌6%，9447跌得2%。買中企指數C輪，梗係揀9962。
新地C輪：新地（016）近排硬淨，6月年結已過，遲吓打出宣布末期業績日期，股價可能再賀一賀，再硬淨多一分。新地若有回吐，吼低收集C輪，近期嘅有9977，10月底夠鐘，勝在溢價得1.3%。遠期嘅有2151，明年1月底到期，交投旺，4.5%溢價唔算貴。
章盛