上年炮轟過金曲獎嘅陶喆，前晚喺台灣舉行嘅《全球華語歌曲排行榜》後台講咗句：「台灣很多歌手只會說音樂不懂做音樂。」大家以為陶喆又有料爆，不過去到慶功宴嗰陣，佢就再冇就呢個話題發表意見，重讚言承旭嘅歌做得好有誠意，唱功亦進步好多，又話欣賞王力宏做嘅音樂，令到傳媒好奇怪。而言承旭聽到俾陶喆讚，話差啲想喊，直情係受寵若驚喎。
而校長譚詠麟亦都有出席華語榜慶功宴，之前有報道話張耀榮因為俾藝能娛樂追錢，之後張耀榮轉移埋怨阿倫嘅《左麟右李》演唱會唔預自己，重鬧阿倫係人渣。
噚日阿倫同記者做咗個長途電話訪問，佢話：「黐線！梗係冇啦，唔係佢親口同我講，我係唔會信嘅，而且我都有同佢傾過偈，佢有同我呻過，但係公司行政嘅嘢我真係唔知。」問到如果要求阿倫同張生合照肯唔肯，佢即刻話：「我怕乜呀！梗係唔尷尬啦，影咪影囉。」
之後張耀榮又喺電話度同記者解釋，唔係話阿倫係人渣，而係話藝能股東張國忠啫。阿倫老友曾志偉前日喺長沙知道呢件事，亦唔信張耀榮鬧阿倫，重話張生做咗呢行咁耐，係音樂會教父，相信單嘢好快就會搞掂冇事。
利嘉兒前日喺九展為國術交流活動擔任司儀後，聽晚又要同陳百祥、徐子珊一齊主持大球場舉行嘅《奧運金牌精英大匯演》，佢話：「我怕唔記得運動員嘅名，講錯咗會好尷尬，我都上網睇晒資料做準備㗎。」利嘉兒又話好鍾意劉翔，希望當晚可以同佢見面，佢話：「佢嘅鬥志好犀利，我好欣賞佢。」
官恩娜噚日喺尖沙嘴出席Canon相機活動，佢話自己成日都會影相，好似有時見到啲飯餸賣相夠靚都會影一餐，𠵱家唔經唔覺學影相都有五年，屋企重有成千上萬嘅相片。今次大會送咗部打印機畀佢，啱晒佢用嚟列印數碼相片。
關德輝拍嘅電視劇《兄弟姊妹》喺台灣台視黃金檔期嘅收視攞第一，因為佢喺劇中要講台語，所以要即學即演，都幾有難度。前幾日佢出席歌迷幫佢補祝嘅生日會，其中有個fans儲齊咗關德輝喺台灣出嘅所有唱片要佢簽名，關德輝話有啲碟自己都冇，所以要問番個fans喺邊度買。
