蘭西噚日到熱賣中嘅東涌藍天海岸售樓處，碰到文化界名人馬家輝博士，佢自爆剛以四百五萬，買咗個千二呎單位，方便佢位十一歲囡囡，第日去迪士尼玩，認真廿四孝！
兼任電台時事節目主持及專欄作家嘅馬家輝，未知會否將新思維帶進藍天海岸，但肯定已帶出樓市正面訊息。佢話十分認同中原集團主席施永青話樓市會「一浪高於一浪」嘅睇法，又透露持有香港同深圳四、五個單位，入市從未錯過，不過蘭西發現佢今次係經美聯買樓，可能令施老闆非常失望。
古董愈舊愈值錢，估唔到村屋都一樣。
世紀21錦大地產分行經理王惠萍表示，大棠丈量約份一一七號一幢三層高嘅二十年村屋，剛以四百七十萬賣出，呎價二二三八元，比新落成嘅村屋呎價一六六七元，足足高咗三成四，重係同區二手村屋十年新高㖭。原因係呢幢村屋附連萬三呎巨型花園，十分罕有，而一般連花園嘅最大都係一千呎。
原業主持貨十三年賺百七萬。聽講買家諗住做度假屋。
番禺祈福新邨賣咗十幾年，港人都好熟悉，發展商祈福集團另一南海項目「祈福南灣半島」，計劃本月十一日展示現址售樓部、示範單位及社區環境，二十五日發售。
祈福南灣半島首期共三十五座獨立別墅，三十個半獨立別墅及聯排別墅，而水岸洋房及複式約二百個。面積由七百五至三千八呎，售價二十六萬起。全部工程上個月底竣工。
美聯物業喺澳門嘅第一間分行開咗冇耐，已經決定再開多間嘞，果真睇好當地樓市。咁快扑槌，原來係集團主席黃建業嘅決定。
聽講黃主席喺月初去北京前，過咗澳門一趟，視察環境，返港後就拍板開第二間澳門分行。
美記澳門第一間分行開張時，黃建業冇去剪綵。今次嘅決定有乜微言大義，佢嘅夥計真係要探究一吓。
樓價看升，業主以「先買後賣」方式換樓最着數，中原地產維港灣分行經理甘尚德話，近排都幾多呢類例子，大角嘴維港灣有名業主就係咁換樓，慳番唔少。
個換樓客住緊九座中層六○九呎G室，兩房單位，住咗兩三年，因小朋友漸大，所以想改善環境，但就淨係想住番同屋苑，睇樓兩周，終於喺上月中用三百九十萬，買入六座高層D三房單位，九二九呎，呎價四一九八元。
日前，佢就以二六一萬賣出自住嘅單位，呎價四二八六元，比同類單位造價高啲，又比買入單位嘅呎價高。
蘭西
電郵地址：
