舊年因為棉價高企而備受冷落的紡織股，終於在近期抬頭，獲證券界一致唱好，大部份紡織股的股價都顯著回升，原因除咗棉價回落外，當然重有配額制度即將撤銷，市場預期大陸紡織品出口將大幅增加。
市場上有多隻紡織股，例如魏橋紡織（2698）、福田實業（420）以及較細隻的華豐紡織（364）同錦藝（565）等，經紀黃話，芬佬買貨通常必買行業龍頭股，所以買紡織股都係以大隻行頭，暫時要大唔要細。
南海石油（076）上個星期二股價一度勁跌近九成半，爆出大股東被斬倉沽出千幾萬股嘅新聞，認真矚目夾駭人，由於早排玩笨豬跳的股票例如遠東生物制藥（399），一停牌就停咗好耐，所以有人估計南海石油有排未復得牌，但聽講解釋清楚之後，可以在今日復牌．真係又嚇咗小初一大跳。
經紀陳話，由於隻股咁快復得牌，加上停牌前經歷斬倉，原本囤積在炒家大戶手上的貨源，可能已經掟到散晒，唔知落在乜人手上，故此今日復牌，股價可能仍極為波動，跟炒風險會好大。
慕容小初