莊士機構（367）對上8個交易日成交2154.4萬股，幾乎等如再之前28個交易日成交股數，莊士開始有火氣。上星期，地產界消息話，莊士位於西半山明德軒，獲一家基金出價1億元洽購20伙單位，洽購數目佔呢個樓盤1/4（總數76伙），若果大家傾得埋，除咗成為市場一個好好嘅指標，唔多唔少或者會掀起街客搶購潮，亦即係話，依據基金落場價計，明德軒全幢售罄，套現4億元，估計純利6000萬元，趕得切05年度（3月止）入帳，有利莊士PE倍數繼續走低。
去年後沙士期，大家耳熟能詳嘅二三線，包括莊士在內，升到飛起。雖然今年頭大市唔掂，大家齊齊調整，但家陣唔少當炒股份，收復好多失地，其中富豪（078）更創埋年半新高。今時今日，莊士距離52周高位0.73元，重有一大截距離。
呢勻莊士有火，咁先啱路數，皆因股價落後得太離譜。好似富豪咁，追番兼破埋52周高位，莊士嘅潛在升幅50%樓上，所以若果呢勻唔係虛火，莊士非同小可。
本周第二件有利（406），可以講三點。第一：有利無PE，但04年度（3月止）只蝕9000蚊，相對03年度1897萬虧損，業務有改進。第二，除建築本業外，年來積極開源，包括經營銅鑼灣霎東街商業中心，10月黃金周概念，有利又有份。第三，每股資產值1.85元，資產折讓73%，大到離譜，隨時係黑馬，現水位扒冷，無壞。
錢雋