噚日風和日麗，港交所搞咗個海上之旅，租咗隻大型遊艇，請一大班記者去西貢大浪西附近嘅海灘遊玩。
主席李業廣同行政總裁周文耀星期四先至喺上海開研討會，話咁快就飛返嚟出海。不過李主席喺上海患咗傷風，噚日八方見佢唔算太精神，但依然興致勃勃，上船冇耐佢就好似電召的士咁樣，叫咗佢隻私家遊艇畀記者見識。
八方開頭以為佢講笑，但冇幾耐真係有隻遊艇駛咗埋嚟，八方自然要上去參觀，原來隻遊艇係李主席專為潛水而設計，船艙底層嘅房間一推開門，就可以跳落水，遊艇重備有十幾個氧氣樽，玩幾日都夠。
西貢海面雖然唔算太乾淨，但港交所高層霍廣文同一位女記者一於冇有怕，照落水玩個痛快，霍主管話佢一向好少出海，所以點都唔放過機會，赤膊上陣，周總裁就惜肉如金，唔肯落水，記者自然影唔到佢露點相。
傳真︰2623-9278
電郵︰