日本人氣水着女星若槻千夏，前日因中暑而導致發高燒及急性腸胃炎，被緊急送入醫院，佢手頭上嘅工作亦全部被迫取消，而佢原定今日出席嘅活動亦要由同屬一間事務所嘅師妹岩佐真悠子頂替。
若槻喺日本嘅人氣愈來愈勁，工作更接踵而來，不過日忙夜忙之下，前日佢終於捱唔住病咗。若槻喺前日到醫院求診，經醫生診斷後，證實佢因中暑而導致急性腸胃炎，當時若槻發高燒超過攝氏四十度，重需要即時吊鹽水，醫生就建議佢即刻入院休養。
現時若槻喺日本除咗會定期為六個綜藝節目演出之外，平日又要忙於拍攝寫真同埋廣告，真係好鬼忙。早排佢就曾經同搞笑藝人岡村隆史以及矢部浩之嚟過香港拍廣告。而佢喺入院前兩日，重去咗天氣炎熱嘅沖繩為節目錄影，難怪最終頂唔順。𠵱家若槻手頭上包括節目錄影以及拍廣告等工作全部都被迫取消，睇嚟佢嘅fans要等一排先可以再見到佢。
若槻話：「要大家擔心實在非常唔好意思，我會盡快康復，請大家等等我啊！」聽到若槻呢番話，我諗關心佢嘅fans都應該會放心。