管理專業協會噚日搞咗個與CEO對話嘅研討會，嘉賓包括地鐵行政總裁周松崗、冠軍科技簡文樂、中電阮蘇少湄，同埋八方好崇拜嘅聯想集團女當家馬雪征。雖然會議九點半開始，但係仍然吸引到好多中港上市公司管理層捧場。
除咗「蘇眉」無上台之外，其餘三個嘉賓響台上都算係妙語如珠。好似講到國內同胞點樣睇香港人，周松崗話佢五年前返內地玩，拎住部攝錄機四圍拍嘢之際，轉眼間俾一大班細路仔圍住。佢話，呢個唔係問題，問題係有個小妹妹問佢「公公，你這是甚麼玩意？」周總話自己正值盛年，頓時感到好震驚，個心失落咗六個月，所以香港人係需要啲時間，適應同胞點樣睇我哋。
至於馬總Mary呢？佢話國內企業係好需要香港啲專業人才，以佢自己經驗為例，單係舊年就有超過十間企業，搵佢幫手介紹財務總監同埋獨立董事，所以香港人才一定可以喺國內搵到機會。咁將來國內學晒香港啲好嘢後，香港會唔會失去存在價值呢？馬總話：「點解教識徒弟會餓死師父？係因為個師父唔識upgrade自己囉！」唔知台下香港人收唔收到馬總嘅意思呢？
（圖）周松崗（中）笑到擘大個口，唔知同阮蘇少湄（左）及馬雪征（右）傾緊乜呢？李潤芳攝
傳真︰2623-9278
電郵︰