重記唔記得奧尼爾喺加盟熱火時，揚言會努力減肥，今季以最佳狀態亮相。睇嚟佢嘅減肥計劃得到初步成功。巨無霸日前出席美國MTV頒獎禮時，身材明顯「苗條」咗好多，原來佢已經成功減咗二十四磅肥肉，𠵱家體重已經由過檔熱火前嘅三百五十五磅，減到三百三十一磅。
不過熱火對佢有更高要求，總裁萊利希望巨無霸可以喺下個月季前集訓營開鑼時，再減多六磅。
以奧尼爾𠵱家嘅進度，再減六磅肯定冇問題，到時重可能吸引到瘦身公司搵佢做代言人㖭！
其實巨無霸近幾年身體不斷發福，搞到身手同狀態愈嚟愈差。湖人一早就要求佢減肥，但奧尼爾全當耳邊風，今次佢咁有決心減肥，睇嚟想喺熱火大展拳腳，證明自己就算冇咗拜恩都一樣掂。
巴西足總同AC米蘭最近就「放人」問題鬧得好僵，連朗拿度都加入發炮，認為卡卡、卡富同埋迪達都應該向AC施壓。正所謂你有你鬧，卡卡等三人冇就朗拿度言論作出回應，前日約埋另一同鄉沙真奴一齊睇一級方程式蒙扎站試車，卡富重高呼過癮，一於靠風馳電掣車速忘憂。
祖雲達斯件波衫嘅款式同顏色係黑白直間，同斑馬一模一樣；佢哋新教頭卡比路為咗幫隊波宣傳，竟然送三隻斑馬畀都靈一家動物園。我求大俠以為卡比路淨係教波叻，估唔到佢搞宣傳都有一手；但係，祖記上屆食白果，卡比路得閒搞啲咁嘢，不如諗吓點幫球隊攞好成績好過。
朗尼過檔曼聯，唔單止令愛華頓穩執二千萬鎊，重令利比里亞嘅兒童受惠。事關愛華頓有成總值超過六萬鎊嘅朗尼十八號波衫賣唔出，於是將批衫送畀利比里亞嘅兒童，清倉之餘順便做善事。愛華頓咁有善心，就算佢哋實力唔強，相信喺今屆可以保住個英超聯席位啩。
拜仁最近內訌，球員狂插教練馬加夫話佢冇料到；馬加夫還擊話班留長頭髮嘅球員（如波勒同辛達告魯斯）顧住喺比賽前gel頭，當正自己係明星或模特兒，本末倒置。馬加夫可以學前阿根廷教練巴薩里拉咁，迫班球員剪短頭髮、甚至剃光個頭；冇頭髮，自然冇得gel啦！