自言還未定性的陳冠希緋聞一直傳個不停。對於緋聞情人應采兒和2R的Rosanne，陳冠希明顯對應采兒很有好感，但愛追求新鮮感的他，還是會繼續認識女孩子。
出道四年的陳冠希（Edison）緋聞不絕於耳，數月前與相戀兩年多的陳文媛（BoBo）分手後，又先後被傳與應采兒和2R的Rosanne墮愛河。對於緋聞纏身，Edison感到不勝其煩說：「呢四年嚟我不斷要同傳媒解釋我啲感情事，真係覺得好煩，同你哋否認，你哋又唔信。」
Edison在訪問中三番四次強調自己性情率直和真誠，亦希望別人真誠待他，但當問到他與BoBo是否已分手，他卻說：「我從來冇承認過呢段戀情，又何來分手？我只可以講同佢係好朋友關係。至於應采兒，由《愛君如夢》識佢到𠵱家，我同佢真係幾傾得埋，兩個人相處得幾開心，佢個人係幾好，但呢一刻我都係當佢好朋友！至於將來會點，我就答唔到你。講到Rosanne，其實我只見過佢一次，咁啱就俾記者影到相，我對佢認識唔係好深。」
雖然Edison明知自己很容易惹上緋聞，但他強調不會因此謝絕與異性約會，他激動地說：「同女仔出街就係等同拍拖，咁我咪好唔得閒？𠵱家我因為有間時裝店，需要搵啲女歌星做model，咁我唔親自見啲人，又點知啱唔啱用呀？入行頭嗰兩年，我反而好少主動識圈中人，但為咗間舖頭，我就改變咗好多。」
外形俊朗的Edison，朋友中以女性居多，他解釋說：「可能因為由細到大我都係同媽咪及兩個家姐一齊住，所以習慣有心事都會選擇同女性分享，所以同女人特別傾得埋。」
可能女性好友太多，Edison不易向外肯定誰是真命天子，他坦言：「講真吖，我𠵱家的確有幾個女性好朋友係可以進一步發展，成為親密女朋友，但我咁忙，根本冇時間拍拖，真係唔想負累人。
「你都知認定一個女朋友就需要負上做男朋友嘅責任，而且呢段時間我自問未定性，我鍾意追求新鮮感，發掘自己唔同嘅興趣，所以鍾意不斷認識新嘅女性朋友，如果要定性，我諗再過三年，等我二十六歲，可能呢個時候自己可以定落嚟，咁樣先去認真識個女朋友會比較好。」
