以前嘅富達「麥哲倫」基金嘅經理林治（Lynch）非常出名，佢有一句投資金句，就係投資者最好了解、親身體驗投資對象嘅業務。譬如你鍾意食漢堡包，日日到M記，見到生意好好，就買M記股票。左丁山咁講，或者太過簡化，但相信冇誤解林治嘅一個投資方法。
有啲事情係唔使學嘅，醒目仔女會自動明白。Y師奶鍾意化妝，鍾意買平嘅化妝品，經常到S記分店睇貨，正是唔買都睇吓，見到人客愈來愈多，內地客塞滿分店，居然醒目到去銀行開戶口買S記（化妝品零售公司）股票，老公Y先生問佢點解要買S記，Y師奶：「直覺囉，我覺得S記生意咁好，一定賺錢，咪買啲股票囉。」Y先生半信半疑，但係你唔好理，Y師奶嘅投資回報，好過佢先生多多聲，因為隻S記股票好掂！
Y師奶亦都經常去超級市場，覺得超市好方便，街市又熱又濕，新一代女性慣去超市，唔去街市，於是想買超市股票，但搵唔到喎，呢日碰到左丁山，於是問計。左丁山話：「你買化妝品股，中到應，但係找超市股票，香港唔覺有，世界性嘅大超市股票有沃爾瑪、家樂福……」Y師奶話：「我都唔識嘅，費事買咯。」
師奶直覺直情犀利。呢日翻閱《亞洲華爾街日報》，一版之內有兩段公司業績新聞，其一就係法國超市公司Carrefour（家樂福），○四年上半年純利升5.3%，達五億三千七百萬歐元，好似好大。營銷額升3.3%，達三百八十六億歐元，純利率只係1.4%，好低啫！咁大超市做一百蚊生意，賺得一元四角！其二係化妝品公司L'Oreal，○四年上半年嘅營業額係七十四億歐元，純利九億六千一百萬歐元，純利率達13%，L'Oreal生意比家樂福少，純利比家樂福多，買股票，買化妝品公司應該好過超市公司！