以柔道為電影題材，都好耐冇接觸過，香港導演拍攝更加少見，筆者所講是杜琪峰嘅《柔道龍虎榜》，今個星期已經出咗3區DVD；精裝燙光封面設計超精美，dts-ES靚聲效亦甚具誠意，不過最過癮係Bonus收錄了近30分鐘杜琪峰專訪，內容首度曝光，由故事解畫，到電影嘅光、影、拍攝技巧都談論到，杜Sir迷一定不容錯過。
記者：朱崇德 攝影：陳偉強
老戲迷都知，《柔道龍虎榜》原是黑澤明的出道成名作（日本原名《姿三四郎》，1943年）；唔好以為杜Sir玩抄作，故事內容兩者完全不同，不過一脈相承嘅係「鬥心爆棚」兼極度勵志，難怪杜Sir話明此片是向黑澤明致敬。另外提提大家，DVD盒面《A-1頭條》廣告封條，其實是一張免費戲飛，千祈唔好手快快掉咗！如果急不及待想即刻睇，DVD片頭重有一段預告片，習慣飛片直入Menu嘅人，咁就走寶嘞！
《柔》是一班過氣柔道高手重拾鬥心的故事，歌廳經理司徒寶（古天樂飾），曾是一名柔道高手，數年前不知何故放棄柔道，而且沉淪為嗜賭酗酒的廢人，一日尚武的皮褸Tony（郭富城飾）慕名上門挑戰、宿敵辣手阿岡（梁家輝飾）又為一場未完的比賽找上門、年紀老邁的師傅（盧海鵬飾）又為拯救破落道場來求助，歌廳頓時成為柔道「武道場」，而司徒的鬥心亦因而再度燃起。
杜Sir這套《柔》好明顯是有感而發；70年代的《姿三四郎》好能代表那個年代的青年，有信心、又堅忍，而且輸咗可以企番起身；相對時下的青年，遇上少少挫折，就意志消沉，所以杜Sir電影中以柔道為寓，古天樂嘅嗜賭酗酒廢人、張兆輝嘅麻木不仁黑幫大佬、蔡一智嘅弱智徒弟同盧海鵬嘅年老體衰柔道師傅，都好能反映現實社會中的失敗者，佢哋冇放棄柔道亦等於冇放棄自己一樣，只要一份「鬥心」還在，不論成、敗，都可以站得起來。
有別於杜Sir以往嘅「男人片」一味Sell剛陽，如「彈弓加兩磅」嘅名句，又或者打到血肉橫飛嘅場面都唔會喺片中搵到，代之而來是點點的真實，及怪雞的幽默；片中最喜歡是配角張兆輝的黑幫大佬，片尾講述張原來並冇台詞範本，全部由演員自己，從角色性格推敲出來，最頂癮是開場機舖同中段歌廳4張枱一幕，啜核、抵死、市井又爆笑；古仔片中亦見賣力，例如同郭富城第一戰，原來「鉸剪腳夾頭」斷氣表情，導演係要佢哋假戲真做拍出來，真係唔嘢少！
必睇Bonus
杜琪峰專訪
一般Bonus，都會加入電影前期宣傳訪問；不過今次《柔》有啲唔同，佢係由PANORAMA在電影出碟前，再同杜Sir做訪問，所以大家喺戲院睇完唔理解嘅問題，都會喺度搵到答案；不過筆者最鍾意嘅，係杜Sir解釋對鏡頭運用、光影配搭、演繹角色技巧同電影理念嘅訪問，全段訪問近30分鐘兼首度曝光，睇完好似上完一堂電影課！
DVDPRO
地址：旺角奶路臣街6E德發商場地庫B4舖
電話：23326326
