𠵱家啲人慶祝結婚周年紀念頂多都係食餐飯、去吓旅行，老夫老妻肯買份禮物嚟𠱁吓對方已經算係好有心，但原來香港已故名人何東夫婦就唔同。何爵士嘅後人、寶覺小學校董許佐賓，噚日約埋一班記者行家去參觀佢間差啲被殺嘅學校，講到何爵士同佢太太張蓮覺居士慶祝結婚周年紀念嘅故事。
張蓮覺居士好慈悲，當年何爵士為咗慶祝結婚紀念，畀咗筆錢太太，張居士攞咗啲錢冇用嚟買花戴，反而開咗間佛堂東蓮覺苑，而逃過教統局「殺校風暴」嘅跑馬地寶覺小學就係張居士一心開嚟畀啲失學女仔讀嘅。
許佐賓話，當年張居士重會帶啲學生仔去山頂同遊船河，等啲低下階層都可以認識吓個世界，呢啲情懷，教統局嘅高官又點會明吖！
八方同班行家都覺得成間學校古色古香，學校會定期帶學生到佛堂嗰邊舉行宗教儀式。而喺香港三年零八個月嘅淪陷日子，學校都堅持辦學，到一九五四年竟然收到日本一個佛教大師嘅來信，向張居士道歉，承認日本侵華係唔啱，深深懺悔，又送咗一幅用日本少女髮絲織成嘅平和觀音掛畫畀佛堂。許佐賓話，國家咁多年嚟要求日本道歉都唔成功，張居士冇要求過就得到，都算厲害。
傳真︰2623-9278
電郵︰
