「望與後生靚仔合作」
施嘉莉水都拖肥尊嫌老

第六十一屆威尼斯影展一揭幕就有唔少負面新聞，包括有反全球化人士喺會場外抗議，又有人批評大會只係識搵荷李活明星造勢，忽視影片質素；不過前日所見，影展氣氛依然熱鬧，咁當然要歸功於一班荷李活影帝影后人馬撐場啦。

影帝影后撐場
奧斯卡影帝丹素華盛頓（DenzelWashington）前日去到威尼斯，同金像影后梅麗史翠普（MerylStreep）一齊為佢哋主演嘅非競賽電影《洗腦密令》宣傳，不過據外電報道，大家嘅注意力集中晒喺呢兩位大明星身上，反而唔係咁關心呢部已經喺美國上咗一個月嘅電影。
而由金球影帝尊特拉華達（JohnTravolta）同去年威尼斯影展最佳女主角施嘉莉祖安遜（ScarlettJohansson）合作嘅新片《ALoveSongforBobbyLong》，前日亦喺威尼斯舉行首映禮，打扮得好成熟嘅施嘉莉，拖住佢早排話好仰慕嘅肥尊叔入場，立即引嚟一陣哄動，不過唔知係咪已經厭倦咗同啲大叔合作，早兩日施嘉莉同傳媒話：「我好幸運同唔少經典男演員合作，不過希望日後我可以同啲後生靚仔拍檔。」

「詐」彈虛驚一場
另外，前日威尼斯影展收到炸彈恐嚇，主辦單位同賓客都相當緊張，不過最後證實只係虛報，令大家虛驚一場。