隔晚美股好掂，杜指急升121點，港股好友以為今回冇死，點知恒指升過76點之後，埋單反跌50點。港股冇得升，多得Intel收市後發表啲晶片市場數據預測，市場唔收貨，Intel市後交易曾經散過9%。結果亞太區股市幾乎全面向下，日股跌夠130點。
Intel係杜指（工業）成份股，佔比重只係1.55%，又係納指（100）成份股，佔比重4.31%，本身跌9%對指數影響唔大，不過市場驚住佢跌會拖埋其他美股回落。Intel周四收21.65美元，升0.22美元。假如昨晚跌得唔多，則短期美股證明市底唔錯，唔使太擔心。
中銀C輪：中銀早段見過14.50元，收14.35元，冇升冇跌。兩隻多人炒嘅C輪9169同9981，則分別回落5.1%與2.4%。
9169明年2月尾到期，輪價18.7仙，負溢價0.7%，槓桿率7.7倍（有效6.6倍），引伸波幅19.1%。9981明年3月頭夠鐘，輪價16.5仙，溢價2.1%，槓桿率8.7倍（有效6.1倍），引伸波幅26.7%。中銀下周一除息32仙，C輪溢價要計埋呢個因素。中銀近期升得好急，要消化吓。兩隻輪要等回吐多啲先至諗得過，9169靚過9981。
和黃C輪：和黃（013）收62元，跌75仙，調整吓好應該。若然再跌，可趁低諗吓C輪9780。9780輪價69仙，負溢價0.2%，槓桿率9倍（有效7.9倍），引伸波幅29.4%。炒呢件，要睇實日曆，下月15日夠鐘，最後買賣日期係11日。正股3個星期後除息51仙，計埋呢個因素，隻輪有輕微溢價。
章盛