電腦J以前住喺海怡半島,後來搬走咗,但仍然有唔少朋友住喺海怡。電腦J話呢個屋邨有大量投資者持有單位,全部放租,佢自己以前都係租客。
海怡半島最近有暗湧,電腦J從海怡住客得知,海怡南面利南道尾海旁,有一個大油倉,就係蜆殼公司鴨脷洲油倉,據講呢個油倉地皮已經賣咗畀發展商,發展商預備拆咗油庫,改建為四五座住宅大廈,每座樓高五十層咁緊要。呢幾座大廈處於海旁,一定永無遮擋,未來住戶可以享有無敵海景。
但如此一來,海怡第三、第四期啲大廈如二十二座、二十三座、二十三座A等單位,現在望緊海景嘅,將來就會望人哋嘅廚房或者睡房,五十層高喎,乜都遮晒啦!電腦J嘅朋友住在第一期,望到南丫島,蜆殼油倉改變,唔會影響到佢,一於關人個關,但佢聽聞受到影響嘅業主,就覺得好冇癮,業主立案法團會成立專責小組,誓死反對咁話。
電腦J話:「有冇得反對㗎?半山區都經常係新樓遮舊樓嘅啦,愛都大廈啲低層單位邊度有海景睇,望到對面廚房咋。」話分兩頭,海怡業主當然有權抗議、反對。至於有冇力,難講咯,香港經常拆舊建新,條例係幫發展商多過幫住客嘅。之不過,既有合和MegaTower俾灣仔居民反對嘅先例,海怡半島業主未必冇希望,由區議會諮詢開始就去嘈,可以打一場持久戰!香港海景難求,零舍值錢,既有蜆殼油倉改建計劃,受影響嘅海怡半島單位,呎價點會唔跌吖!電腦J話:「我做租客有好處,唔啱就即刻搬,唔使肉痛心痛。」