大市噚日略見回氣，微跌50點。但據講芬佬繼續睇好地產同埋銀行股，由於一眾藍籌地產股已經升得頗多，所以會將注意力放在部份二三線地產股，隨時會升到你唔信。
好似華大地產（201）持有唔少優質物業，單在今年內，就一口氣買入兩個酒店項目，一個在西環，一個在北角，而華大股價同成交亦在近日出現異動，噚日就更加厲害，單日大升15.79%，收6.6仙，成交股數急增至2916.5萬股，金額184.76萬元。
經紀陳話，由於華大業務策略變得進取，聽講淨係兩個酒店項目，投資額就超過10億元，所以江湖有傳聞，華大可能想在股票市場諗計，睇吓有冇可能抽水集資，但好似因為華大久無動作，證券行較為審慎，所以集資一事暫時仍在商討。
另外，即將改名中國信息資源的添發慶豐（661），近來股價走勢唔多好睇，噚日就更勁跌12.5%，收0.35元，成交金額273萬元。經紀陳話，近排細價股冇運行，證券行又唔多肯借孖展，傳聞因大陸炒家水緊，所以股價表現先至咁差。
慕容小初