選舉期間，唔少政黨候選人都會喺報紙賣廣告，八方聽聞民建聯葉國謙噚日向記者投訴，話《蘋果》唔接民建聯廣告，八方好奇怪，以《蘋果》作風，冇理由有錢唔賺，於是即刻問吓廣告部發生乜事，廣告部老友同八方講，前日佢哋喺五點半左右收到民建聯廣告，按正常做法交畀法律部睇吓內容有冇問題，法律部回覆話入面引述好多報紙報道，希望民建聯提供材料，核實引述無誤，廣告部就通知返民建聯個廣告代理，佢哋就傳真咗一啲電子剪報資料，但廣告部為保萬全，就希望民建聯可以傳真剪報正本，但對方就認為比較麻煩，於是廣告部建議佢哋簽一封信，承諾負責廣告法律責任，但民建聯廣告代理一直到七點半截稿都冇覆，到昨日廣告部見到其他報紙登咗個廣告，再搵民建聯個廣告代理，但對方冇覆。
其實民主黨一樣跟足登廣告程序，一樣要簽嗰封承擔法律責任文件，若果民建聯肯簽，《蘋果》當然歡迎佢登廣告啦。
傳真︰2623-9278
電郵︰