房屋協會舊年推出第一個長者屋，將軍澳樂頤居，反應唔錯，事隔一年，推出牛頭角彩頤居，交通及社區設施同樣齊全。今次重有唔少新猷。
房協高級經理許鴻傑話，彩頤居單位內設叫護鐘系統，住戶有事㩒掣，可以同控制室護理員通話，咁就可以放心，知道一定有人嚟協助啦！
好受歡迎嘅室內暖水泳池梗唔少得，有十二米半長，深僅米半，唔怕浸親。
房協又搵嚟聖公會福利協會，提供護理服務，包括物理治療、職業治療、中西醫、牙醫及美容，又有不同嘅興趣班，同圖書館，總之，住喺度不愁寂寞。
淺水灣GrosvenorPlace，貴為每個單位市值超過半億嘅豪宅，物業管理服務，認真有待改善。
淨係call的士，咁簡單嘅服務都做唔到，你話日後點樣服務啲尊貴住客呢？
蘭西噚日去GrosvenorPlace，出席記者招待會，由於代理第一太平，並無安排車輛接送記者，私家路上，又鮮有的士駛過，於是叫管理公司仲量聯行幫手call的士。
點知擾攘咗半個鐘，結果都係冇車到，原因不明。白白呆等半個鐘嘅記者們，最終徒步落山，先至截到的士，趕返報館寫稿。
屯門何福堂住宅重建計劃，經過多番波折後，發展權誰屬，有望今個月揭盅。日前有消息話，新地與業主中華基督教會達成初步協議，不過，蘭西問番該會，回應係至今未有定案。
中華基督教會年初邀請逾十家發展商遞交意向書，經過一輪篩選，教會發言人話，現只與數家發展商商討，已經進入最後階段，佢強調，至今並未跟任何發展商簽訂任何協議，但相信今個月內有決定。
政府較早時將項目內嘅馬禮遜樓，列為法定古迹，教會為令發展規模不變，會要求政府，將周邊斜坡官地納入發展範圍。
蘭西
電郵地址：
