噚日馮仁昭收到讀者來電，話喺劉德華演唱會裏面出現過嘅白獅子，係象徵西藏獨立，於是懷疑華仔有政治立場。但經馮仁昭查證，雪獅係傳說中嘅動物同代表西藏，身上有白色同綠色毛，但華仔嗰隻就係全白色。
華仔噚日喺電話中話：「我唔知白獅子代表西藏，我做騷純粹娛樂觀眾，絕無政治立場。環節講我做羅馬戰士，救唔到愛人，於是有隻獅子陪我唱歌啫，我諗住襯色先揀白獅子。」問華仔會唔會避嫌唔畀白獅子出場？佢話：「我原意都唔係咁，點解要抽？」
華仔又話請咗張學友、譚詠麟、李克勤、吳倩蓮同葉德嫻做嘉賓，前晚第三場嘅嘉賓就係黃秋生，華仔重幫秋生慶祝生日，但紅館唔畀人喺台上點蠟燭，點知華仔就偷雞喺蛋糕上點咗支蠟燭。
而奧運香港男雙乒乓球銀牌得主李靜同高禮澤噚日接受港台電話訪問，話希望睇華仔個唱，高禮澤重親自去排隊買飛，但失望而回。後來透過車淑梅嘅幫助，東亞負責人除咗應承送四張飛畀佢哋外，重安排佢哋去後台同華仔見面。
噚日有報道話施念慈𠵱家揸緊嗰架波子911斷供，馮仁昭即刻打電話畀施念慈八吓，佢話架車冇斷供，一直以嚟好多人都以為架車係陳鴻業一次過買嚟送畀佢嘅，但查實係陳鴻業老竇供緊。雖然施念慈搬出去住都有一段時間，但佢老爺仍然有供車，亦好關心呢個新抱，所以施念慈好感激老爺，不過遲啲離婚手續辦妥之後，施念慈就自己供番架車。
型格十足嘅王菲俾法國名牌Celine睇中任品牌之友，雖然冇現金酬勞，但就免費任着靚衫。其實阿菲一向係Celine嘅用家，Celine覺得佢形象高貴又有氣質，於是就間中送吓手袋同衣服畀阿菲，𠵱家重達成協議任品牌之友㖭。阿菲下個月就會着埋Celine最新秋冬裝，飛去巴黎睇時裝騷。有阿菲做生招牌，一定大收宣傳之效啦！
殿堂級律師胡百全嘅屋企人入稟申請禁制令，唔畀黃夏蕙去瑪麗醫院探胡百全，但日前黃夏蕙夜晚又硬闖醫院，結果俾保安趕走。黃夏蕙噚日本來要去金鐘高等法院出席呢單案件嘅內庭審訊，但佢冇去到，黃夏蕙噚日喺電話度話：「我都冇接過禁制令，梗係唔知要去啦。」
朱茵最近被有線邀請做「Drama女神」，為即將推出嘅多部新劇造勢。早排朱茵就為下個星期一播映、由唐澤壽明同江口洋介主演嘅日劇《白色巨塔》拍攝宣傳片。朱茵猛讚唐澤壽明同江口洋介好有男人味，尤其係佢哋嘅眼神，簡直殺死人咁話。唔知阿Paul黃貫中係咪憑眼神迷倒朱茵呢？
