港股大漲小回，恒指微跌24點。整體形勢幾好，唞完氣再嚟過。未來幾個月，恒指有望上破萬四點，高過今年2月高位（14058）。
恒地C輪：4大地產股中，新世界（017）勇態未消，再進3格，長實（001）企定，新地（016）退1格，恒地（012）唔見5格，收37.60元。同上周三最高39.30元比較，「唞氣」已經唞咗1.70元，唔再超買，9RSI由80嗰頭回到60邊邊，有機會再上番。樓市有運行，恒地挑戰年初42.40元好合理，趁低買恒地C輪。
恒地C輪9038係主角，昨收43仙，唔見2仙，同上周三最高52仙比較，調整咗9仙，夠晒數。睇住恒地反彈，博呢件。9038年底到期，溢價4.5%，槓桿率8.7倍（有效5.7倍），引伸波幅38%。短期睇幾多，睇番上周三52仙個位。
中電信C輪：中電信（726）派半年成績，多賺13%，符合市場預期，收2.575元，跌1格。先一排，中移動（941）派成績表，半年只係多賺7.8%，初初市場反應都係麻麻，股價碌落到21元。唔使幾日，大行又話抵買，快快趣趣殺上，昨日見23.55元高價，收23.30元，仍有進帳1格。類似中移動股價先低後高嘅情況，亦可能發生喺中電信身上，中電信睇好，中電信C輪可以搵隻嚟短炒，易買易賣嘅2219啱晒。
話佢易買易賣，係因為發行量120球，單日成交着咗55球。明年2月到期，溢價17.9%，槓桿率11倍（有效6.1倍），引伸波幅45%。溢價唔平，但壽命夠長，唔使計較得太多。
章盛