許冠英面對許冠文與歌神許冠傑的驕人成績，難免有壓力，曾被刻意賣弄「許冠傑胞兄」這些字眼，害他遭觀眾喝倒采，更為此痛哭。不過許冠英將會飲歌神頭啖湯，返鄉下番禺做巡迴騷。
許冠英因為在胞弟許冠傑（Sam）復出個唱中表現出色，獲得內地主辦商邀請到作巡迴演出，繼早前到番禺登台後，本月二十五日許冠英又會到東莞演出一場，然後年底再到廣東省巡迴演出二十場，一於賺個盤滿缽滿！
許冠英日前在九龍灣錄音室綵排時，坦言是多得「好細佬」許冠傑帶挈，他笑說：「番禺係我哋鄉下，但阿Sam從未返鄉下演出，今次我飲咗佢頭啖湯，佢唔止冇介意，重戥我開心，叫我接多啲㖭！以前做阿Sam演唱會嘉賓，冇咁多人注意我，但今次我多嘢講咗，亦多咗人留意！」
許冠英自言絕不會妒忌兄弟，但會有無形的壓力，他說：「好多時我做節目，啲主持介紹我出場時，懶係故弄玄虛咁話：『今日請到許冠文……個細佬』，又或者係『許冠傑……嘅哥哥』，搞到我一出場就俾人噓，感覺真係好難受，搵我嚟做嘉賓點解要咁侮辱我、玩我啫？人哋以為我好玩得，唔介意，其實我好介意！有幾次頂唔順，返屋企喊出嚟㖭！」
許冠英續說：「到最近都依然有人咁做，一個歌神，一個影帝（許冠文、Michael），生活喺佢哋兩個影子之下真係好大壓力，當然呢個完全唔關阿Sam同Michael事，係人哋畀嘅壓力。
「所以我希望能夠好好把握𠵱家嘅機會，發展自己事業，例如再出唱片咁，呢個係我最大心願。」
採訪、攝影：戴彩煥
