地產建設商會主席何鴻燊，一向唔滿意政府大量供應土地，推冧樓市，搞到發展商冇啖好食，對於近日接連有發展商高調指摘，政府補地價定價過高，何生不但冇幫腔鬧埋一份，重公開唱反調，猛話補價水平合理。
究竟係佢同其他發展商唔咬弦，抑或有其他原因呢？認真撲朔迷離。
日前恒基地產主席四叔李兆基開聲話，政府補地價定價過高，噚日就輪到新世界發展主席鄭裕彤發炮，指近期政府批出嘅補地價，金額唔合理，可能係「唔想批得過低俾議員鬧」。據佢所知，政府唔批嘅補價個案有二三十單。
至於華懋小甜甜龔如心，都認為政府索價過高。
發展商賣樓時，就猛話樓市好景，樓價一加再加，但講到補地價，就完全兩回事。
內地樓市一向都以一手為主，二手暫時未成氣候，不過，泛城（中國）呢年幾以嚟，對上海中高檔二手樓市，進行資料搜集同分析，終於做咗首個上海二手樓房指數，叫「泛城住宅指數」。
呢個指數報告，重包括每月熱點、市場分析、近期展望，以及成交案例四部份，定期每個月十號公布。
泛城話，七月指數係一一九點九三，比六月升二點四點。預計下半年，價格升幅有九個巴仙。今年上半年，就已經升咗九點五三個巴仙。
近期樓市又熱鬧番，投資者入市掃貨，個案幾乎變成每日例牌菜，業主就開始反價，估唔到𠵱家連銀主都跟埋一份去反價。
美聯物業分行經理葉初聲話，屯門卓爾居五座高層C室，九百二十五呎，銀主最初開價二百三十萬放售，點知竟然有五個買家出價爭。眼見咁好環境，銀主即刻反價到二百三十八萬至賣。結果由一名用九成半按揭嘅上車客買咗，呎價二千五百七。
銀主盤通常到價就賣，估唔到𠵱家重可以有得反價，賣高啲，睇嚟呢排個市真係幾好景。
配合赤柱富豪海灣貨尾解封，美聯推出富豪級服務宣傳，噚日安排兩架勞斯萊斯房車，接載富豪酒店執行董事范統同美聯董事陳坤興到場。兩架分別香檳色同淺紫色嘅勞斯萊斯，外形搶鏡。聽講車租連司機，每次盛惠八千蚊，價錢同坐一個鐘直升機差唔多。
想一嘗坐名車嘅感受，可以喺今個月，透過美聯安排參觀富豪海灣，不過陳坤興話，公司會安排唔同嘅名車，接載睇樓客，有冇機會坐到今日亮相嗰兩架勞斯萊斯，就要睇緣份啦。
蘭西
電郵地址：
