好耐冇佳作嘅金像導演奧利華史東（OliverStone），將會喺十一月推出史詩式巨製《亞歷山大帝》，而扮演主角亞歷山大帝嘅愛爾蘭男星哥連菲路（ColinFarrell）係首次參與咁大堆頭嘅製作，所以佢兩個都好緊張呢部製作費達一億六千萬美元（約十二億四千萬港元）嘅電影票房。
憑《殺戮戰場》同《生於七月四日》兩奪奧斯卡最佳導演嘅史東，最擅長拍攝以戰爭同史實為題材嘅作品，今次《亞歷山大帝》可謂開正佢嗰瓣，佢本人當然希望憑呢部戲再揚威奧斯卡，所以佢拍得特別嚴謹，去勻英國、摩洛哥同喜瑪拉雅山等地方取景。而戰爭場面亦冇花冇假，盡量唔用電腦特技，好似佢要拍一場印度森林大戰，就拉大隊去泰國國家公園取景，重出動大批大笨象嚟增加氣勢。
電影除咗由哥連扮演戰無不勝嘅馬其頓國王亞歷山大帝外，韋基馬（ValKilmer）同性感女神安琪蓮娜祖莉（AngelinaJolie）分別扮演佢父王同母后，史東重搵咗金像影帝安東尼鶴健士（AnthonyHopkins）扮演亞歷山大麾下一員猛將㖭。
另外，大家應該有留意到安琪蓮娜先後同哥連以及史東傳過緋聞，𠵱家就話同戲中老公韋基馬打得火熱，真係唔知係巧合定係宣傳伎倆嘞。