港股在萬三關口有壓力，噚日恒指創出今浪最高的13088後便掉頭回落，大部份時間在萬三關口爭持，收市12999，跌24點，成交146億元。
恒指由8月16日的低位12151起步，一直到噚日高位13088，共上升937點，中段未有較大幅度的調整，在萬三水平停一停，消化一下，後市的升勢會更為健康。
呢輪大藍籌輪流上，噚日大市雖回氣，仍有個別藍籌有強勢表現；大行主力買住嘅中移動（941），一度升上23.55元，收23.3元，升0.1元。
在港股下一個升浪中，中移動同滙控（005）將會擔當重要角色，佢哋嘅Call輪亦係投機者至愛，食大茶飯對象。
國企指數收報4350，跌7點，亦係正常調整。大戶買藍籌，買到街知巷聞，其實佢哋收國企亦係好積極，不過，可能因為未買夠貨，所以周不時使出震倉招數，到收集完成，時機配合，國企將會出現媲美去年底嘅大升浪，升幅由5成至1倍不等。
吉林化工（368）係一隻有機會倍升嘅國企，早輪宣布靚靚業績時，股價一度升上1.6元，近大半個月來，就在1.35元同1.46元間整固，呢個位上車，等升破1.6元阻力，大升浪就確認，短線上升目標2.2元，中線可見3字頭。
吉化04年度（12月年結）嘅盈利表現，肯定會好突出，中期獲利已6.06億元（人民幣．下同），大升148%，其中首季盈利2.59億元，次季3.47億元。
上半年業績勁，下半年可能重勁；吉化話到明：「力爭在今年1至9月份利潤比去年同期增加200%到250%」，以03年首3季盈利3.5億元為基數，今年首3季獲利將介乎10.5億元至12.2億元，以12億元計，即今年第3季盈利達6億元，全年盈利保守估計可去到16億元，大升2.73倍，每股盈利0.445元（折0.42港元），預測PE僅為3.45倍。
吉化A股（深000618）股價5元，H股有折讓高達70%，差距遲早會收窄，亦都係H股未來上升的動力（其他大折讓股亦然），以現水平倍升計，吉化PE亦只係7.1倍！
郭兆誠