香港郵政噚日舉行香港貨幣特別郵票發行儀式，四款郵票展示咗香港過去百幾年曾流通過嘅貨幣，歷史價值唔在講，加上金融管理局總裁任志剛嘅精采介紹，令死板嘅郵票有晒血肉。
任總話，新郵票最老嘅主角係一八六三年香港委託英國皇家鑄造廠打造嘅香港首枚「一文錢」硬幣，當年可以買到一碗白粥或者一條油炸鬼；另一主角係一八六六年首次由香港鑄造廠出品嘅首枚貳毫銀幣，間廠老早拆咗，𠵱家剩番一個紅色紀念牌。第三款係一九三五年發行嘅首張一圓鈔票，當年屬於大鈔，可以買到三十斤米；最後一款係九七年推出面額一千元嘅香港回歸紀念金幣。任總不忘補充一句：「我都有份設計洋紫荊硬幣。」
（圖）任總除咗大講錢幣嘅故事，重幫買郵票嘅人簽名㖭。
傳真︰2623-9278
電郵︰