曼聯出手誰與爭鋒！紅魔擸得朗尼，費SIR事後好招積咁話，「如果唔係紐卡素出手在先，我哋都唔知道朗尼想走。」當然以曼聯嘅財力，打低紐記用三億幾買一位英超神童自冇難度；但係我求大俠就想質疑吓費SIR今時今日嘅領軍才能。
作為一支歐洲頂級球會嘅話事人，當然絕對要做到好似華叔講政治人物咁，要做到無懈可擊；否則落台喺現今屬家常便飯。費SIR上述呢番豪情壯語，似足一位富家嘅少爺仔，想買邊件玩具，父母幾時會話托手踭；但治軍無可能沒有長遠政策，即興買人，試想強如皇馬，每年一星，甚至今年三星，又是否一定可保證捧盃歸呢？何況朗尼重有傷在身。
其實我大俠始終覺得堅尼成日受傷，紅魔中後場鎖匙人後繼無人，可能先至喺最棘手嘅問題；費SIR，下年一月又要諗吓買邊件玩具啦！
波神又復出？ESPN爆料話米高佐敦最近閉門狂操，呢排頻頻喺芝加哥同一班NBA球員練波，一個禮拜就起碼鬥三場，重有傳聞話佢想加盟熱火，同巨無霸奧尼爾做隊友，真係唔知堅定流。其實波神今年都成四十一歲，應有自知之明，我就唔係咁睇好佢真係會第三次復出喇！
拜仁門神簡尼最近俾一份德國時裝雜誌，評為去年秋冬衣着最差品味嘅德國男士，由上次第六位跳升到榜首㖭！雜誌批評簡尼雖身穿名牌，但無留意每個品牌形象特點，結果着上身顯得不倫不類。我求大俠勸佢踢好啲波重好，再出現利華古遜場波俾人數四粒，重肉酸過着錯衫。
阿根廷高路仙尼，自從九九年加盟AC米蘭之後，一直係球壇「人球」，借嚟借去，季前球員名單都無佢份。不過，AC遞交歐冠盃大軍名單時終有份，獲派哥斯達古達上季件十九號球衣，前景明朗。我求大俠對高路仙尼印象唔錯，AC後衞多老將，加入個年輕球員都啱㗎！
英超聯球會修咸頓日前召開高層會議，商討聘請喺名義上重係英格蘭國家欖球隊教練活禾特爵士做領隊嘅可能。如果修咸頓真係由活SIR嚟教，我求大俠可以肯定，佢哋班球員嘅體能肯定操得好弗，但就擔心佢哋球員好似欖球員咁，將啲波炒晒上天，到時想入波都幾難。